Saturday, January 22, 2011

Duku Padagangon

Kivaa songuhun momutanom papadagang do duku. Monodo no iziaha o kopoihan ih popoiho do papadagang iziaha do duku om podokoton no o kopoihan di id pompod posoihi

hamin dau. Mamaso iziaha monutuk i paku touvi noh id kopoihan dii, om nopiumanan kivaa tuhun mamagazat oh gaung dau. Tiduku noh iziaha om kivaa songuhun tanak kusai

miampai mato poinbulou moboos: "Momohi zou daa iso duku mantad diau."

"Oo... obuli" Ka di momutanom, miampai maso mimihid tumos id douvi hikud dau.

"Duku nopo diti nga mantad baka ih tavasi om kigatang avasi montok usin nu" Ka vagu di momutanom.

Tumiduku toluai ii tanak kusai om posuangon noh hongon dau id suang kakalung om pohobuson noh usin pisa om pataakon no ii kumaa di momutanom.

"Kivaa tohu ngopod sin. Kouhaa ih nangku?"

"Kouha" Ka di momutanom.

Momohou noh di momutanom ii tasu dau, "Dolly!!" Ka dau.

Habus no ih tasu miampai apat duku tonini. Kagazo mato i tanak kusai nokokito om popoinsomokon i voos dau kumaa id tansa. Noikot noh oondos ih tanak kusai dii nokokito.

Mamaso ih tasu mikot minsomok ii tansa, nokokito vagu ii tanak kusai dii kivaa po mingugua humabus mantad hamin tasu dii. Kivaa iso duku minsimpod mamanau tumanud id duku

suvai nga nokotouvi. Mimang daa sumikap mamanau nga kotouvi nogi.

"Mimang zou ihia". Ka di tanak kusai, moninduk ih duku id douvi.

Singkotud no ii momutanom id doos ii tanak om poboos: "Oi tanak, au ko mimang o duku dino. Au katangkus om mamain  miaga ii suvai duku."

Mamanau tokudi ii tanak id douvi do tansa om mongopi tokudi ii iso takod souva dau. Kokito di ih momutanom do bosi id sampaping takod tanak dii.

Poboos noh vagu ii tanak, "Au zou oidau tumangkus om mimang zou daa songuhun ii kalati".

Id pomogunan diti, noponu oh tuhun ih kalati.

(Transelated from: Puppies for Sale @ http://www.indianchild.com/puppies_for_sale.htm)

RM1,500 GISOM 15,000 TAANU MOMUTUNG GETAH SOMBUHAN

5th January, 2011

KENINGAU: Momumutung getah id sokid kaanu do tangangazan piahatan RM1,500 gisom RM15,000 sombuhan, ka di Panakadai Montili Kotundaan Dahabus Kakadazan Sabah, Datuk Hj. Sairin Hj. Karno.

Ka disido, gatang do getah nokoinsavat mantad po di toun nakatahib, om ounsikou zou miampai kobuuon diti.

Gatang getah kepingan (poinzopos) kigatang RM7.05 sen sekilogram toi ko RM7,050 setan, ino nopo nga nokotoguvang koinsvatan gisom 85 piatus id lahan abaa kozo mantad po sontoun nakatahib.

Iti kilati ka di Sairin, mogiigizon i kivaa do ginazo pomutanaman 5 ekar nakahantoi tuminabib gais komosikinan.

Sokuukuang nokozo do 60 piatus mogiigizon id Keningau kivaa au okuang 2 ekar pomutanaman getah.

Sairin i nogi Hahansanon Layat Liawan mokianu do layat id uvang dino mooi manaak pongintangan kumaa pomutanaman i hobi kopountung, miaga do getah om piasau mamau.

“Noikot nodii timpu montok layat humaang osodu id doguvang montok mumpazat boogizan pomutanaman i hobi kopountung,” ka disido ontok nasamaanan ontok suminoomo mongungundi id uvang Liawan.

Minonimba iso tudizo, minoboos i Sairin, pomogunaan bibit di tavasi nopo nga haang tabaa i mositi onuan pongintangan do momutanom.

Ka disido, bibit di kikualiti takavas dati hobi apagon piagahon di kivaa no haid, nga ka disido momoguno bibit di tavasi kapanaak guhi di olipat.

“Tokou mositi mongkimamaa montk koonuan nuununu di tavasi,” ka disido.

Kumaa iso tudizo suvai, minoboos i Sairin momutung getah nopo nga iso kalaja di kopiagan ningkokoton miampai kalaja upis di suvai.

Nogi ka disido, tangangazan songuhun momutung getah osodu hobi kinavas piagahon gaji songuhun kalani.

(Credits: New Sabah Times)

Sunday, January 16, 2011

Kopivosian doid diau...

Jane:     Oo.. doiti ko nogi?
Mary:    Oo'. Doiti'.
Jane:     Onu binohi nu?
Mary:    Minomohi zou do kinotuan on sada'. Onu diau binohi?
Jane:     Minomohi zou do vagas. Ingkuo no paganakan nu do baino?
Mary:    Angavavasi' ngaavi zioho'. Ingkuo kou no iziozu?
Jane:     Angavavaasi' ngavi izikoi.
Mary:    Songian ko iziau do muhi?
Jane:     Muhi zou nodii izou. Ingkuo ko iziau? Au' ko po muhi?
Mary:    Au' zou po izou muhi'. Kivaa po indadonku.
Jane:     Bah. Doiti' ko no iziau. Mamanau zou nodii izou. Nokoikot no iho' bas.
Mary:    Bah. Tumodo no.

(Source: Kadazan Language Book)